و مين يتمنى يبقى وحيد
و ايده تبقى من غير ايد
و يتكلم على روحه
و يفضل فى الحكاوى يعيد
لكن من قسوة الدنيا
ما بين اللحظة و التانية
بيبقى العمر بالثانية
مفيهش جديد
ويبقى كلام مالوش معنى
كتير منه بيوجعنا
و ناس مش عايزة تسمعنا
بنشقى أكيد
و لما تكون يادوب انسان
ما بتحسش غير الاحزان
و شايل م الهموم ألوان
و مشتاق مرة تبقى سعيد
ضرورى تروح فى لحظة هناك
عشان نفسك بتستناك
هتحكيلها و تحكى معاك
بدون ما تحددوا المواعيد
تقول ما تخافش تصارحها
و تقبل لو بتجرحها
و حاجة بسيطة تفرحها
ساعة ما تريد
............
فهمى على