بتخنق ضحكتك جواك
و غرقان ديما فى الأحزان
و عايش حد غير روحك
و بتخاف لو تكون انسان
سنينك غصب عن عينك
بتجرى و السبق شغال
لا ليلك كنت يوم صاحبه
ولا نهارك سألته سؤال
و لا خبطت على بابك
عشان تدخل و تتكلم
بنيت ياما عليك أسوار
و جوا منها تتألم
كفاية لف فى دوايرك
محيط الدايرة بلا آخر
خطاوى كتير بتمشيها
و عن نفسك بتتاخر
يا فاكر بكره مستنى
و جايب حلم ما حلمتوش
خزاين بكره لو تعرف
بخيلة و طبعها بتحوش
فدوس خوفك ما تسمعلوش
و صالح ضحكتك جواك
و سيبها تتطل فى عيونك
ساعتها ... بكره يستناك
...........
فهمي علي نصر