أنا ممكن اكون حبة أحاسيس
و استنى فى حلمى كتير مايجيش
فاتعلق مرة بضحكة حلال
و اعمل جناحات و اتوهم ريش
وأسافر جوة نهار مخنوق
و أصاحب ليلي ... فقلبي يعيش
و انا ممكن اكون باهرب من شئ
و اتدارى بعيد و اتمنى الاقيه
و أطوِّل أوى و اسرح فى حاجات
و اختار يوم ضاع و أحن اليه
و اكتب فى كلام ... و امسح و أعيد
و اتعمد ألخبط فيه معانيه
إنما فى غرامك ... أنا مجنون
و جنونى بيوصف حالتى بجد
لا بخاف م اللوم و لا اصالح نوم
و لا باشكى مشاعرى فى سرى لحد
و باحاول قلبى يعيش فى براح
فبحبك حب يفوق الحد
............
فهمي علي