انا رغم انى بقيت كبير
محتاج على صدرك انام
محتاج انزل دمعتى من غير كسوف
و لسانى ينطق بالكلام
محتاج اقولك غبتى ليه
و ازاى تروحى ما ترجعيش
طب كنتى اخرتى المعاد
او وريتينى ازاى اعيش
طب ما انتى عارفة ابنك ضعيف
و ان الهموم جواه جبال
و ان انت بس يا طيبة
بتجاوبى ليه عن ميت سؤال
اهو بعد منك دنيته
رفعت سيوف الخوف عليه
وطوفان وجع عدا الجسور
سرق الحياة من نور عنيه
كل الحاجات الحلوة بعدك مررت
و اتلخبطت كل الخطوط
و الصبح ضلمة مرعبة
و الموج ما بتحوشهوش شطوط
بحر الحنان بعدك نشف
و القسوة مالية الروح جروح
لما انتى غبتى يا طيبة
الروح بقت عطشانة روح
و انا رغم انى بقيت كبير
لسانى مش عارف اشوف
لسانى بابدأ من جديد
لسانى خوف مدفون فى خوف
و ايام سنينى المجهدة
من يوم غيابك مسروقين
تايه انا بين البشر
بياخدنى ليه ليكى الحنين
لو كنتى ناوية تتطولى
و تغيبى اكتر م اللى فات
فما تزعليش ... هاجى انا
ما انا يا اما .... حبة ذكريات
ما بقيتش باخلص م الوجع
ما بقيتش يا امه عارف اكون
و العمر يا اما ان يوم رجع
انا فيكى هاختار السكون
........
بقلمى : فهمى على