و الليل بيستنى النهار
من الف عام
فاتح سكك و بيندهه
بس النهار كره الكلام
كره ان يبقى اللوم عليه
من كل من خاف يبتسم
او يترسم
اصل الحقيقة مؤكدة
بس العيون بتخاف تشوف
بتخاف تبص على السنين
و الدنيا ... ممنوع الوقوف
الصبح علشان يعرفك
محتاج عيون و مفتحين
محتاج يحسك
فيك نفس بيطول و يتحدى الوجع
و يدوس على كل الالم
محتاج يشوف جواك جدع
الليل بيستنى النهار
يخرج ما بين انياب زمن
يكسر بايده الف ناب
و يولع النار فى الوهن
بس الغريبة ..
الليل سكون نايم بقاله الف عام
فارد لحاف على جتته
بينادى .. و بيرجع ينام
فيا كل ليل جوا البشر
حاسب بقى
ارمى اللحاف اللى انت تحته
و الدفا صار محرقة
عمر الحياة ما تكون صور
و لا حتى لوحة مزوقة
سيب اللحاف و بلاش تخاف ..
و تسيب امالك تنتحر
و بلاش تعيش وهم الجمال
و تقول نجومى و القمر
هز السكون ...
حاول تكون ف الدنيا
كما صوت الوتر
................
فهمي علي نصر