على العُكَّاز ...بقلم الشاعر / حماده البهلوان

على العُكَّاز أنا ماشى
وماشى يا دنيا ضد الريح

واقول طيب مَيجراشى
دَ ياما زِيّى فيه مجاريح
كَسرهم جرحُهم جايز
وفاتهم مغروسين فى الطين
جذوع يَبسانَة وعجايز
على ظُلم البشر ساكتين
وحَر الحِلم يكويهم
عشان يحيا الأمل فيهم
ويشتد العطش بيهم
لكلمة حق ترويهم
فيخضَر الزمان تانى
ويضحك قلبه مِـ الفرحة
ولا يقاسى ولا يعانى
ضميرهم لمَّا يوم يصحَى
ويصرخ مِـ الوجع جوفهم
قتلنا سكوتنا بصراحة
فلا سكوتهم ولا خوفهم
هيضمن ليهم الراحة
لكن ليه السكوت والخوف
وضَىّ الحِلم فينا أكبر
لا ليه فـ غروب ولا فـ كسوف
وانا مِـ اللحظة دِى هاقدر
أدوس عَـ الأرض من غِلِّى
وهاتعكِّز على الأيام
واسابق خطوتى وضِلِّى
عشان اوصل لحِلمِى أوَام
.................
‏حمادة_البهلوان‬