كل البشر شافوا القمر
شافوا الضياء
والوضع طبعا مختلف
اللى سكن قلب القمر
غير اللى شافه من بعيد
اللى قعد ف سنين عجاف
يحلم يقابل بسمته
يحلم معاها يكون سعيد
بس القمر خدع البصر
خدع اللى عاشق بالعيون
أما فؤادي اللى سكن
شاف الحقيقة كلها
شاف القمر قطعة حجر
مفهوش مشاعر او حياة
مفهوش غير الاشعاع بريق
زغلل عيون كل البشر
زى القصيدة الميتة
اللى كاتبها من سنين
كِملت بكل ما تشتهي
والحلم كان تصعد لفوق
تبقى القمر تبقى الجبل
اللى خدع يوم ابن نوح
شافه العظيم شافه القوي
ولا جه ف باله انه جماد
شكله حلو ، عطره ندى
صمته جميل، صوته صدى
بس القمر هو القمر
زى الجبل ماهو جبل
مفيهمش روح ولا عمرهم
ذاقوا المشاعر زينا
زي القصيدة الميتة
اللى خدعني زهوها
وأنا لسه شايف من بعيد
أما الفؤاد اللى سكن
شاف الحقيقة كلها
شاف التكبر والغرور
شاف القمر قطعة حجر
مفهوش غير الاشعاع بنور
#سيد_البالوي