قالولي ارسم
رسمت الدنيا ليلة عيد
وأب وأم وعيالهم
بلبس جديد
وبالونة ومرجيحة
وبمب كتير
وعيّل حاضن (الصندوق)
في ركن بعيد ..!!
هدومه (التايكة) بتقولك
انا مرفوض
انا عايش انا موجود
ومش موجود
بيحقن نفسه بالضحكة
في ليلة عيد
كإنه جوا (ڨاترينه)
خيال معروض
قالولي احلم
سكِّت شوية وانا خايف
اقول ماعرفش
ما انا اتعودت اقول حاضر
ولا بسألش
هَاتولي آكُل هاتولي اشرب
هاتولي العيد
لقيتهم ضحكوا وانا بضحك
وقلبِت (أَلش)
حضنت بإيدي صندوقي
وانا ببكي
ولاحظوا وقالوا معلشي
ياريت تحكي
وقفت وصوتي متغير
ناديت وناديت
(معايا لبان بنص جنيه مفيد صحي)
(معايا ملبس الاصلي و بالنعناع)
(معايا الحلم كان فيا وحلمي اهو ضاع)
نزلت بهمي علي ركبي
وانا منهار
صرخت وقولت مين شاري
انا (متباع)
لمحت في عينهم الدمعة
ونظرة (ليه)
مسحت دموعي بإيديا
وقولت يا(بيه)
يجوز شكلي واحلامي
فقير كحيان
وتبقي كرامتي فوق مني
و(تنزل ليه ؟؟)
طلعت الدنيا ماعرفشي
غير التخبيط
لا أب وأم ولا عيلة
ولا حضن بيت
وخدني (الأسطي) رباني
وعشت معاه
علي طقة يصبحني
وعلي علقة انا اتعشيت
في اوضة عشت وياهم
عيال بالزوف
وما ادراك من اللمة
ونوم الخوف
عيال بالظبط من سني
ونفس الحال
لو احكيلك هتستغرب
من الموصوف
تخيل طفل من سني
معاه (سيجارة)
وده بيقلد الأسطي
(مثلنا الاعلي) بجدارة
وطفل مخبي كام صورة
لواحدة ست عريانه
وطفل كلامه (سب الدين)
وبيفكرها دي شطارة
وتسألني هقولك (اااااه)
انا والهم
بقوم من بدري ع المترو
عشان (المَم)
ومن حلوان لحد المرج
انا واقف
في برد وحر مش فارقة
طفحت الدم
بشوف الصبح ويوماتي
هنا تلامذة
وزي صحاب وبنلاغي
بكام غمزة
وبسرح في اللي كان مفروض
اكون بينهم
ده حتي الفرق ماعرفهوش
مابين (ألفاً) وبين (همزة)
قالولي .. الحل
صعبت علينا وكلامك
كلام فاهمين
هننزل نشتريلك طقم
ونديلك كمان قرشين
ضحكت وقلت مش عاوز
ومش محتاج
انا عايز اكون انسان
يابني ادمين
انا عايز أشوف امي
وآخدها في حضني مش اكتر
انا عايز أكون تلميذ
وانا قادر اكون أشطر
انا عايز يكونلي صحاب
انا اختارهم
أكون حاجة تشرفني
ده يوم ما اكبر
وكانت صدمة خلتنا
نقف ساكتين
إيدينا ورانا وعيونّا
عليه باصِّين ..!!
وسابنا وهو متأكد
من الإجابات
مفيش فايدة مفيش أحلام
وكل ده (مات)
وغاب عنّا
وصوته لسه في ودانّا
(معايا لبان معايا سواك ودي حنة)
(معايا الحلم لو حلمي ده كان ممنوع)
(معايا الضحكة لو عيني بتبكي دموع)
وكان مبسوط
لإنه حكالنا وسمعناه
وكان بيعدي في الشارع
(ويا الله)..!!
وتخبط حلمه عربية
يموت في الحال
ولسه الضحكة علي وشه
بتترجاه
يموت الحلم متغرب
ولوغاريتمات
ويفضل ذكري نحكيها
مع الحكايات
جريت وعنيا بترغرغ
وانا مخنوق
صرخت في جسمه (هزيته)
ضروري تفوق
لقيتني بفعل عشوائي
ومش مقصود
حضنت الدم في إيديا
مع الصندوق
لقيتني ناديت (بصوته)الحاد
و بالغُنّه
( معايا لبان معايا سواك ودي حنة )
( معايا الحلم لو حلمي ده كان ممنوع )
( معايا الضحكة لو عيني بتبكي دموع )
................،،......
احمد الصارم