جدى اللي محدش يشبه له
ف اعمامي
أو في ولادهم
أو في إخواتي
و لا واحد غيري
في الشكل
و الطبع
و حتى في لف العمة
و علامة الصلا ف القورة
و الشنب الواصل في الدقن
كان يفرح لما احكيله عن المدرسة
و علومها
و يدس في جيبي قروش
علشان الشيخ كان قاله
إن الواد اللي معاك مش سايبك
ختم القرآن
كان يسكت لما احكيله
كأني أنا جده
علمنى كتير
علمني اطول بالي ساعات
و ساعات البال مايطولش ثواني
علمنى فنون الزرع
علمنى المرجلة طول الوقت
و اتعلم منى يفك الخط
و يفهم شعر المتنبى
و درويش و فؤاد حداد
حبيت على ايده السيرة الهلالية
و جابر ابو حسين
و عديد النسوان الممزوج
بالنكتة
جدى اللي مالوش و لا صورة
غير واحدة في قلبي
انا وحدي اللي اتعلمت الدنيا
على ايده
كان نفسي أكون على اسمه
لكن ما رضيش
عرفني
ان الاسم لوحده
مالوهش غير صاحبه
و مالوش من غير المرجلة
ايها فايدة
علمنى اكون انا نفسي
و بس
علمنى في وقت الغضب
اتبسم
انا حاسس لمسة ايده الخشنة في ايدي
و هو واخدني الجامع
أول مرة
و حاسس دمعة عيني عليه
في الغسل
وقفتي على قبره
جدى اللي واحشني و ليا معاه
حكايات بالكوم
اتوفى قبل ما ازور الدنيا
بعمر طويييييييييييييييييييييييييييييييييييييييل
و اللي مزعلني
ان ابويا كمان
مش فاكر
شكله
..........
جابر الزهيري