امى كانت حد تانى
غير بقيت كل البشر
جنة فوق الارض ماشية
بس جنة بدون خطر
شايلة ضحكة فوق خدودها
كت حدودها الكون بحاله
شايلة ابويا و كل ناسه
و الجميع وياه عيالة
فاتحة بيتنا لناس كتيرة
اللى رايح و اللى جاى
اى حد معدى لازم
م الغدا و ف عقبه شاى
امى كانت .. بس كانت
لما كان ف الكون دا خير
خير بيطرح للحبايب
طرح طيب و بضمير
كت بتجرى للى عايز
قبل ما يقول انه عاز
الفقير كان ابن ليها
دى الحقيقة .. مش مجاز
الف واجب للعروسة
و اللى يوم صابه الهوان
و اللى عنده ف اهله موتة
و اللى موجوع م الزمان
مش كلام علشان دى امى
لأ .. حقيقة و اسألوهم
احلا ايد كانت تطبطب
ع اللى ايامهم فاتوهم
وشها كان صبح صافى
بس مش محتاج ادان
كل وقت عنيك شوفها
نبع نور جواه امان
لما شافت مرة شنبى
بان ف وشى و لسه نونو
حسستنى بانى راجل
علمتنى ازاى اكونه
مد ايدك للى تلقى
ايده مش طايلة و راعيه
راح تلاقى عند ربك
شئ هتفرح يا ابنى بيه
الغلابة يا ابنى نعمة
بس لو تعرف تشوفها
بنك مفتوحلك تملى
و الحياة هى و ظروفها
مرة يبقى معاك و قادر
عندها بحبح ايديك
قد ف يوم تحتاج .. ساعتها
مش هتلقى غير ما ليك
امى كت اجمل حكاية
مهما قلمى كان فصيح
و الحروف بصراحة عاجزة
رغم انه كلام صريح
......
فهمي علي نصر