يا حبيبتي مالك ليلك طال
حملك تقل و الحمل اهو مال
بنقول يمين فبتمشى شمال
و بتملى بدن الحر جروح
عاشقك و عشقك مش ببلاش
يعنى اللى حبك مات .. مش عاش
بتنسى و القلب ما بينساش
ليه الميدان ما بقاش مسموح
السيف ف ايدك بقى بتار
بيحصد الارواح بالعار
الليل دهو فيه بعده نهار
و لا الامل بقى مش مطروح؟
يا قريبة و منى بعيدة
يا حنينة و بردو عنيدة
و دمعة فى عيونا جديدة
هاستنى فجرك لما يلوح
يا حب جوا الروح ساكن
و قلوب و لا احلا اماكن
لو كان ف وشك لون داكن
بالله لبكره يزول و يروح
دا الخير ف اهلك و ف ناسك
بصى و شوفيهم ... حراسك
و الف كلمة ف كراسك
بيصبرونى ف بانسى انوح
بانده عليكى فجاوبينى
يا ضى نور شايله فى عينى
مدى ايديكى و ضمينى
يا سر لما القلب يبوح
...........
فهمي علي نصر