ما تقولى لى ليه عنيكى
دبلانين ما بيضحكوش
و الدموع محبوسة فيهم
زى شوك تحت الرموش
و اسألك يا حبيبتى مالك
يبقى ليه ردك ... مفيش
طب هتحكى لمين قوليلى
لأ دا انا غيرك ماليش
صدقينى الموج هيهدا
و السفينة هترسى بينا
حلمنا بكراه ينبت
و الحياة تنده علينا
مش هاقولك لما شوفتك
رغم صمتى و رغم صمتك
اد ايه حسيت بغربة
اد ايه جوايا لومتك
كنت محتاح لما اشوفك
القى ف عيونك حياة
فوق شفايفك ضحكة هادية
تبقى ليا طوق نجاة
صدقينى انت الحقيقة
اللى غيرها الصبح ليل
و البداية و النهاية
وسط عالم مستحيل
....
فهمي علي نصر