و كان فـ بلدنا كام توته
و مرجيحة و جميزة
و جدة بتحكي حدوته
و كانت بنت حتتنا
تعدي من قصاد بتنا
ببسمة شوق صغنطوته
دا كان الحلم متقسم
و كان الجسم متكسم
نقول مزيكا علي النوته
و حبتها و حبتني
بكلمة و نظرة شغلتني
و فات العمر و سابتني
و قلبي بيطفح الكوته
و مر العمر أهو عدا
و فات القطر و لا هدا
و لسه برسم الورده
فـ وسط كتابي مبسوطة
جواباتها و حكايتها
و دبله فضة و الحرفين
و كام دبدوب مع الكارتنين
و قلم الروج و بسكوته
بيجي الليل و قلمي غريب
ما بين أوراقي و الكراكيب
بيرسم حلمي ع المكاتيب
و ضحكة و فرح بنوته
تموت الفرحة فـ عيوني
يموت اللحن و النوته
و جميزة بلدنا تموت
تموت توته ورا توته
و ماتت جدتي و الليل
ماعدش بيحكي حدوته
......
بقلم .. مصطفي تيسير