من كتر كلامهم و جروحك
هتفكر تهرب من ذاتك
و تخاصم ضحكاية فى روحك
و تفرط فى معانى حياتك
و هترجع تندم و دموعك
هتلاقى مكان جوة جفونك
و الليل هيصاحبك و يطول
فتتوه فى جنون جوا جنونك
و سؤال جواك يكبر ... يكبر
و جوابه يعاندك و يكيدك
و لأنك عارفه و بتكابر
هتكتف بقساوتك ايدك
و يفوت الوقت .. تخاف منك
و الحلم الطيب هيفوتك
و هتسجن روحك و هترضى
يتدارى كلامك فى سكوتك
فتبيع ايامك برضاهم
و حياتك تتساوى بموتك
................
فهمي علي