بتبيع بكام ؟
ياللى انت واقف بالقلوب
وسط الزحام
و بيعلى صوتك بالاوى
وقت الندا
علشان بضاعتك
مش بضاعة و السلام
بتبيع بكام ؟
بتبيع قلوب فيها
اللى كان عشمان يعيش
و حروفه من حلو الهوا
ما بتترويش
ينظم قصايد عشق
للى ما حسهاش
ما لحقش عاش حلمه
اللى كان ما بينتهيش
و قلوب بتخلق فى القلوب
حب الحياة
ضحكتها تزرع الابتسام
و تداوى روح من الف آه
رسمت طريق للى
ابتلا بنار الحنين
ماسكة ف ايديها
طوق ينجى الغرقانين
لكن طريقها نفسه
ما صادفش النجاه
..............
فهمي علي نصر