مجاش الشعر ما عداش ولا خبط .....بيتغابى
وفاكر إننا ف غابه
ميعرفشى انه عبد الشاعر المصلوب
على جذع انتظار الآه
ميعرفشى انه مش مسئول
ساعة ما الناس تقول للشاعر الطاهر
كلامك ده مالوش عازه
ويتهموه بإن الشعر مش ابنه وهوه ابوه
فمن اين له هذا
مجاش الشعر وبيخلف معاد معروف...وبيماطل
برغم انه قاعد عاطل
ولا شغله ولا مشغول
ولا ساكت ولا بيقول
ولا يملك من الكلمة اللى ملطوعة على الجدران
ولا حتى تمن بصلة وشقة فول
وبيكابر
وانا صابر عليه لما يفوت الفجر
ويشقشق صباح الخير
ساعتها نهز شجر الصمت
ينساب الغنا م الطير
فايطلع راهب الكلمة يسيب الدير
فايتقابل مع صوفى
سعيده عليكوا تتنسم عبير القدس م التحرير
وتصدق شمسنا فى شعاع
وتحلف بس م النعمة بعود نعناع
معادشى قناع يخبى الوش م المرآه
بقى كله على عينك
مفيش يا شعر ولا كلمة بينى وبينك
وكله مشاع
وبكره هايجى بالمعنى وتنطلق القصيدة حياة
وهنسميها مبروكة
وهتقضى جميع من كانوا أهل الله
وأهل الصفه والخندق
وأهل الشعر والمعنى اللى كان وياه
وكل اللى سكت لما الزمان اندار
وكل اللى دخل داره وقفل الدار
وكل اللى ميعرفشى ابو سفيان
وهيكون الهرم آمن
وهيكون الحرم ضامن
يطوف الشعر أى ميدان
فيا شعرى متتأخرشى عن بكره
انا مش صاحب الفكرة انا مجنون
بقول وانت اللى بتصدق كلام موزون
لكن اصلى
وشوش الخلق شاهده عليه
تجاعيد الشباب قنايات
واحلامه اللى متباعه
على الناصية وفى الإشارات
وتفسيرها مالوش لاعزيز
ولا مفتى ولا مسئول
وبكره تقول
بإن الكلمة من حقى غنا وموال
وإن الشعر من صلبى
كلام صالح..... وإبن حلال
........................
حمدي موسى