بحبك ليه ؟!
ولساه السؤال حاير
ومش لاقي بجد جواب
أبوس إيديك تجاوبيتي
ولو ردك كلام كداب
يا بنت الأيه كفاية عذاب ..
يا حب العمر وسنيني
هاقول الحق واشهدلك أنا بحبي
وحبي ليكي متنيل بدون أسباب
بحبك ليه ؟!
كأن القلب مش ملكي
وأحساسه ماهوش بإيديه
يا حسرة عليه ..
كأن لسانه متلجم
ومش لاقي كلام يتقال
يكنش بجد انا واهم
وحبي ف أصله شغل عيال ؟
ولا يكنشي المثل صابني
وشايفك جوا عيني غزال ؟
صحيح كل العبر فيكي
ورغم كل بلاويكي ..
أنا حبيت ..
وقعت لشوشتي ع الأخر
وم الأخر .. أنا طبيت
كأني مريض وبتمنى
أغمض عيني وأفتح
الاقيني خلاص خفيت
يا بنت الأيه...
ولساه السؤال حاير
بحبك ليه ؟!
ومستني الجواب القاه ...
وأنسى معاكي قولة أااااااه
وعهد الله .
............
محمود السيد