الحكاية ...
إنى مشغول بيكى جدا
ﻷ وبحزن ...
لما اشوفك ... حاضنة خوفك
عايشة بين ... لو كان ... ويمكن ..!!
حبة ندمانة ... وحزينة
حبتين ... عاقلة ورزينة
واللى قاطع بس فينا
يوم ماكان الصعب ممكن
حتى أنتى ... خليتى بينا ..!!
يومها كان الوضع محزن ..!!
كنا يومها شعب واحد
كله واقف ضد واحد
قلبه جاحد ...
باع أصولك
وابنه كان عايز يطولك ..!!
بس كنا ... قلب واحد ..!!
يومها قالوا ..
طاب هيمسك مين بدالو ..؟!!
شب فالح ... لو نجحت
اصله سوس ضارب لتحت ..!!
قالوا نخبة ...
وشككونا حتى فيها
مصر عن بكرة أبيها
ماعدشى فيها ..!!
كلفتونا ... وجابوا شحط ..!!
كلمتو ... عند الجماعة
أكلتو ... ويا الجماعة
قعدتو ... ويا الجماعة
علا من شأن الجماعة
بس ساب الكل تحت ..!!
علا صوتنا ...
شوفنا موتنا بإيد كلابو
و ف سنة حضرة جنابو
جاب أخرنا ...
واللى قبله مص خيرنا
قال تمرد لو سمحت ..!!
كل واحد خاد قرارو
قومنا ثورنا ..!!
والبعيد دوقنا ... نارو ..!!
قولنا راحل يعنى ..راحل ..!!
بس قولنا .. فيه مؤامرة
كله عايز بنت سمرة
توبها نيلى ... شعر ليلى
خلخالين بنور ... ف كاحل
وش زى البدر بيزين المكاحل ..!!
عودها فارد من حلايب
لما جاب اسكندرية
بنت بين الناس ( بهية)
بنت حرنانة ... وشقية
بس فيها القلب دايب ..!!
بنت جدعة ..!!
لخبطوها ولخبطونا ب 1000 خدعة
فهمونا إن فيكى الحب ... بدعة
وإن تحت الظلم فيكى
السلم أدعى ..!!
قصقصونا جناح وريش
زودولهم ف الرواتب
واما قولنا اشمعنى هما
قالوا عدل ..!!
وقالوا شرطة
قالوا جيش ..!!
يعنى من غيرهم
بلدكم ... ماتساويش ..!!
واحنا كان وجه اعتراضنا
لو شوية عدل يعنى
عشان نعيش ...!!
دول قالولنا نموت بجوعنا
علشان مافيش
بس سايبين الحشيش ..!!
واما حاكموا ف العصابة
فجأة يدولهم براءة ... وقالوا طيش ..!!
فتحوا جيبهم للمصالح
والتصالح ... بإتفاق
حط إيدك جوه جيبك
فيه شفا من كل داء ..!!
يعنى تتأدب وتدفع
قرشك الأبيض هيشفع
والمعارف برضه تنفع
مهما بيضيق الخناق ..!!
عندنا ف القرب مرتع
عندنا إسطول نفاق ..!!
والشعوب مقدور عليها
كله تحت السيطرة ..!!
كلمتين ... تضحك عليها
لقمتين ... بتجيب ورا ..!!
دى الحكاية واللى فيها
للى عايز بس يفهم ... إيه جرى ..؟!!
..............
سعيد شكري