ولسة الثورة موجودة بحطة إيدى ع الميادين
وسامع صرخة الآهة فى شوك التين
هنجنى الثمرة رغم الدم
وهانلبد فى حضن الشمس
رغم ان القلوب ناعمين
هناك كلمة محدش قالها فى الهتافات
ولسه شعار محدش رفعه ف مظاهرات
ولسه قلوب بتعمل نفسها ماتت
لكن عايشين
ولسه بنات بتطلب مهرها شهداء
ولسه دعاء بيصعد للسما طالع لناس صالحين
ولسه رجاء
ولسه جنين بيصرخ جوه رحم الغيب
وبيقول اقبلوا عمرى ولو ساعتين
ولسه نفوس بتتوضب
ولسه الجرن متحضر لكام اردب قطن وشاش
وفيه فارس خرج يتعلم الحكمة ولسه ماجاش
ولسه كتير
حاجات يمكن تكون اساطير
ودايما ثورة سلمية
ماهو احنا الشعرا بنحارب
لكن دايما بأغنية
عشان احنا بتوع النور
بنبنى الحلم وبنطلع لآخر دور
ومن فوق الأمل بنثور
ولا يمكن يكون الدم تمن الحق
ولا يمكن هنبنى قبور
وهبنا الشعر للمحنة وبطلنا غنا وهزار
عشان احنا رسل جينا
نمد إيدينا للكهنه وللفجار
ولو حتى مفيش كفار هندعو الكل للتوبة
وندعو الكل للجنة
ونتمنى مفيش واحد يروح النار
وثورة شعرنا ماشية لباب الدار
ف كل شوارع الكلمة
وكل حوارى حرف الحق
من مكة لسيمون بوليفار
هنمشى خلف مانديلا وجيفارا
وبابلو نيرودا والمختار
عشان أحرار
وهانحضر جميع أرواح من ماتوا من الابرار
ماهو احنا قصدنا نغير بسيف الشعر
كل حوار
نمد جسور نهد اسوار
تموت الكلمة لو ماشيه بدون مشوار
وايه الشعر لو معرفشى يبقى فنار
وايه القصة لو مش عارفه تبقى عشار
وتولد رأى يطلع منه ألف قرار
لابد نعيش على معنى يجمعنا ونبقى كلنا ثوار
نثور دايما على روحنا
مانستناش فى مطرحنا
لحد مايجى واحد تانى يمنعنا من الأفكار
وهنكمل بشكل جديد
بثورة بس شعرية
بسيف الكلمة هنطير رقاب الزور
وهانزلزل حيطان الصمت
تحت الطابق المستور
هنعمل دنيا من توبنا
يا إما نغور
نبطل حلم ونبطل كمان افراح
يموت الشعر والشاعر
و كلب وراح
..............
حمدي موسى