طب ليه نزور الأوليا ؟
وليه حبيبتي من الهوا نطلب مدد ؟
ونحط ليه انا وانتي إيدنا على المقام
واحنا اللي علمنا البشر
كل البشر معنى الغرام
ومين في دنيا العاشقين
ممكن يكون قد المقام
إياك حبيبتي يوم تخافي من الحسد
داحنا اللي كانوا قبلنا
واللي هايجوا بعدنا كمالة .. عدد
لو كانوا بس بيفهموا
أو حد منهم كان صريح
كان كل عشاق الهوا
عملولنا كام مليون ضريح
ويطوفوا حوالين مننا كل البلاد
واتمنوا لو كان الطواف
طول السنة ومن غير ميعاد
روحوا افتحوا كتب التاريخ
حتى اسألوا يجي ألف شيخ
هايقولوا قصة حبنا
مكتوبة من قبل الميلاد
والكون بحاله قبلنا عامل حداد
والدنيا نسيت فرحها ولبست سواد
كان كل حلم بنحلمه بيكون .. كابوس
إيدك في إيدي نبتدي
نحيي الأمل جوا النفوس
إيدك في إيدي نبتدي نعمل قاموس
حاسس خلاص ان الكلام مابقاش يفيد
كل المعاني بتشتكي مافيهاش جديد
حتى البشرعايزين دروس
واحنا حبيبتي المدرسة
والمغرمين واقفين طابور
مستنيين من كام سنة
جايين عشان يوفوا النذور
طالبين مدد من حبنا
واللي يخالف شرعنا
ما يهمنا يقدر .. يغور .
عايزين حبيبتي في الهوا
نضرب سوا أعظم مثل
أبقى الخلية ونحلها
وتبقي .. العسل
نملى ربوع الكون نشاط نمحي الكسل
نشطب حبيبتي من الحياة كلمة ملل
يتعلم الطير ع الشجر
من عشقنا معنى الغزل
نمحي بإيدينا المستحيل
نعلن هوانا وحبنا بمليون دليل
نسبق خطاوي العاشقين
نعملّهم م الشوق سبيل
لجل مّا يروي نهرنا
كل العطاشا المحرومين .
سايق عليكي في الهوا
كل القلوب الطيبين
كل القلوب المخلصين
من نسل أدم حتى أخر طفل موجود وسطنا
ياااااااا محسنة .....
طوفي العصور والأزمنة
لفي الدروب والأمكنة
وبأعلى صوتك سمّعي كل الذئاب الطمعانيين
وبكلمة منك قطّعي كل الايدين والألسنة
ياااااااا ستنا ... ياااا ست ... انا
كل الأماني أصبحت .. بيني وبينك ممكنة
وان حد حاول يبعدك عن دنيتي
قولي بسهولة تقدروا بس امّا اكون
تحت التراب متكفنة
تحت التراب متكفنة .
------------------
محمود السيد