باقى من الزمن اللى فات
سيرتك وحبة أغنيات
بيمدوا روحى بالأجل
وعشان امد الروح يادوبك خطوتين
اكتب قصيدة شعر من باب الخجل
كل البيبان متقفله
ومفيش ولا خبطة لقاء
ومفيش شعاع يقدر يعدى
من شقوق المحتمل
يصحى عليه الصمت يفرك وحدته
ويقول صباح
الفل محتاج الربيع
الحب محتاج الامل
فاتوضى ببواقى السكات
واولى وجهى يم صورك ع الحيطان
واحط إيدى ع الشمال
اطمن القلب اللى مال
ناحية ياريتك تظهرى
انشالله حتى ف الخيال
بالله ما تستكترى
واسجد أسلم شكوتى
ف جواب معطر بالدموع
ادعى بخشوع
ليلى ( ياورد ) وصيتك
سلمتهالك دين عليك
انا هاسترده م الزمن
ليلى عروس الشعر فى كل الكتب
صبحت سيرتها فرض عين
على كل شاعر مؤتمن
ليلى حبيبتى اصبرى
الشوق كفر
وانا يا حبيبتى ف الطريق
انا والقصيدة على سفر
........
حمدي موسى