وشوارع مصر
طول الوقت بِتِشغِي حقايق من نور
وِسط الميادين...
ناس أطول م النخل
وأجمل م البني آدمين
لكن مش باينين للعين
محمد افندي العباسي
وفؤاد بسيوني
وباقي زكي يوسف
ومحمد عبدالعاطي عطية شرف
والجمسي ....
وسعد الدين
وخلق كتير سلاطين
اللي رِجِع من غيطه وصَلَّي الفرض ونام
واللي بتحلِب أمل العمر و أشجار الأيام
وبتِدعِي للحاضرين والغايبين....
واللي مفَصَّل جَلَابِيَّة مَقَاس الفجر ومِستَنِّي
واللي بيسنِد إيد البَنَّا وعنيه بتغَنَّي
واللي ف قلب شارُوقِة فُرن العيش
بِترُش طَرَاوَة
واللي بيعمل قلبه حلاوة
ويفَرَّقهَا علي المساكين
واللي واللي واللي.....
هُمَّا الناس الأصليين
المصريين............
اللي ف يوم
خَبَزُوا الأحلام علي وِش الأرض
والعالم كان لِسَّه عجين
..........
يسري زكي