مش راح أسامحك يا اللي قِسيت
و اللي بسببه حياتي نسيت
قول فارقتني عشان ما قدرتش
أبقى عشانها
سور يحميها
و حضن
و بيت
*
ذنبي معاك ان انا حبيتك
على قلبك حنِّيت و راعيتك
شفتك في الأيام مقهور
ع الفرحة ندهت و صحِّيتك
*
خدتك ودِّيتك للجنَّة
و رسمنا على إيدينا الحنَّة
قلت دي فرحة جديدة عليا
وياكِ هاعيشها و هاتهنا
*
على قد ما ضاع مني اديتك
هدتك الأيام ف بنيتك
علشان شفت انك تستاهل
و نجوم السما تصبح بيتك
*
كنت ببان جامدة و قوية
رغم الكسرة المالية عينيا
و اسند ضهرك وقت الشدة
و مايل ضهرى يعلّْ عليا
*
أيوة عليك أنا كنت باغير
و اسهر أبكي بحرقة كتير
و في قلبي أداري اللي قاسيته
و ما حسستكشِ بتقصير
*
و اما لقيتنى أنا عايزة أعيش
قلت انا باخد و لا باديش
كل ما أملك ملك لغيرِك
هي حبيبتي و غيرها ما فيش
*
ع الأرصفة بعترت في روحي
مشيوا الخلق يدوسوا جروحي
و بروح باردة مشيت ويَّاهم
و استعذبت صراخي و نوحي
*
و اللي واجعني إني راهنت
إني معاك راح أرجع بنت
بضفيرتين من تاني و اطير
شبت معاك و رهاني خسرت
ويَّا الحزن أنا عشت تحدي
يا ما واجهته و قلت له عدي
كل ما افكر إني نسيت
ألقي دموعي تجرَّح خدي
*
ها احلف بسيول ساكنة عيوني
وبقهرة وحسرة سكنوني
مش راح اسامح قلبك أبدًا
ع الكحل السايح في جفوني
*
لحظة استني
هو أنا صح بجد كرهتك
و اللا القلب ما عدش يعزك
حاسة أن انا كدابة مخادعة
علشان لسه بجد......... باحبك
......
همت_مصطفى
شكراً لكم على تلك اللفتة الطيبة
ردحذفشكراً لكم على تلك اللفتة الطيبة
ردحذف