سهم مارق من جبينها
بنت ساحرة ف كل حاجة
يبتسملى النور ف عينها
هى قال سايقة السذاجة
مين يا ناس يقدر عليها
ع الشقاوة الساكنة فيها
بنت من كتر الأنوثة
تبقى مش عارفة تداريها
بنت حوا ونور ونار
بنت م الآخر فنار
أو منار للعارفين
ف السكوت شكل الملاك
واما تنطق تشغلك
تبقى واقف بارتباك
أى حرف يبرجلك
يعنى مثلا مرة قالت
آى و L و حرف نون
قلب مش عارف يخون
بنت من كتر الظنون
تبقى مش قادر تبوح
أو تروح .. أو حتى تقعد مطرحك
بنت حرف يطوحك
ويمرجحك .. بين ألف لون
طب مرة شوفت ف ايدها ساعة
جنب تاتو بالحليب ..
كل حاجة تقولى عيب
كل وقت وله أدان
فين ايمانك بالنصيب ..فين ثباتك
فين طاعاتك .. فين صلاتك للغروب
رد قلبى ساعتها .. دوب
انسى اوجاع الفراق .. الاشتياق
الغباء ف البعد عنها ..
قلبى تابع بس دينها
مين يدينها وهى داينة العالمين
أى حاجة هاقول آمين
بس ترجع ليا يوم ..
وامسك الحلم بايديا
اشتهيت طعم النجوم
طمنونى ..
قولوا جاية .
.......
سيد مرسي