انا إللى عملت من حلمى
شجر وبيوت
وانا إللى رسمت احزانى
فضا وملكوت
باهز الحزن جوايا
فيطرح توت
وادارى الجرح فى الضحكه
لحد الموت
واشوف روحى بتتشعبط
وبعمل نفسى باستعبط
ومن غير صوت
والاقى الصبح بيعافر
فى ليل كافر
مايعرف نوم
وقلبى يدق من خوفه
ومش قادر يكمل
عوم
وأنام وعنيا مفتوحه
كما الفناجيل
والاقى بكره متمدد
فى حضنى قتيل
اقوم واخطف
فى كام ضحكه ولو تمثيل
اعديبها بلاد الشمس
واحس الباقي
من حلمى ولو باللمس
وبزرع جوا احزانى
امل أخضر
يهز الموت فى أيامى
فيتشعطر
واتوه من تانى فى السكه
وأعد جراحى بالحته
وأسلم نفسى سجانى
مادام احزانى مجانى
هاعيد الكره من تانى
مادام لسه معندانى
وهافتح قبرى واستنى
ينادى حارس الجنه
ويقفل بابها ويسيبنا
على الاعراف .
..............
اشرف الشناوى