بناقص منها وبناقص
كمان كومنت
لا كانت واقفة على قولها
ولا بيها يا قلبى آمنت
فليه تزعل على طناشها
وغض الطرف فى رموشها
كفانا يا قلبى تهميشها
لاهى كانت فى يوم حاجة
ولا ف ترتيبها أجمل بنت
يادوب حرفين بتكتبهم
لا فيهم معنى ولا صورة
حروفها عديمة الفكرة
وفى التفعيلة مكسورة
بناقص بنت مغرورة
بناقص يابنى حرقة دم
وسيبك م اللى يتجاهل
وسيبك م اللى بيطنش
غلطت وكنت تستاهل
عيار فى القلب مايزنش
عشان مديت لها إيدك
عشان وطيت لها جريدك
حروفك كالشجر واقف
وهي تموت فى تقليدك
وتنسخ فكرتك كربون
ترقص فى البكات وتشوط
وهي تروح تجيب الجون
ويعلى إسمها وأنت
يادوب كومبارس فى المشهد
بغض الطرف عن مآسيك
وعن جرحك ودمع عينيك
وعن كل اللى يوم فكر
يخونك ولا يلعب بيك
بناقص م الجراح وإنسى
وكفاية إنهم عارفين
بإن نجاحهم الباهت
بفعل إيديك
و نص بيشبهك جداً
عليه حرفك
وتحته إسمها مكتوب
عليه ييجى 700 كومنت
___________________________
وائل عبدالله