بقالى سنين
بحاول عينى دى تغمض
تعدى الساعه بالثانيه
مفيش ثانية
بتشبه لاختها التانيه
و جيت انت تغمضها
تهدهدها
تكون الوقفه يوم عيدها
تكون الوانها
تسعدها
تكون جدايلها
تجدلها
تزينها
تحليها
و ييجى الليل تنيمها
و ساعة الفجر
لون عينك يصحيها
و كان عطفك يوضيها
فتتلفت على القبله
و كات قابله
معانى الجرح تحييها
تسبح..
بس على ايدك
بآية الكرسى ترقيها
و تمسح دمعه ف عينيها
تكون ليها كما الحواديت
و من غير نور نعيش فيها
و ليه النور ما دام حسك مضويها
فتمسك ايدها ف الأحلام تمنيها
و تغزل ضلها ضحكة
و لو غمضت يوم عنها
غياب ضيك يبكيها
حكاية و كنت بنسجها
و كنت بلم ف نسيجها
و ازوق فلها بتاجها
ولما عيونى تحتاجها
آلاقى دموعى تحكيها
و كنت انت الامل ليها
و كنت كتاب بيرويها
و كنت الروح و انفاسها
و كنت دنيتى بناسها
و كنت العين و حراسها
و كنت الصوت و غناويها
و كنت الرمش و الننى
و كنت تمللى مستنى
يجيني النوم يهنيها
و لما جيت تكحلها
لقيت قلبك...بيعميها....
..........
جهاد زيادة
الله عليكى #قوه شعريه رهيبه #معذرة لشخصكم تعديل بسيط
ردحذف(وكنت الدنيا دي بناسها)