عاجبِك كده ؟؟
ساعه بارن ما رد البيه
ليه كل ده ؟؟
انا ماعرفش عملت له أيه
قلت أسيبه الشوق هايجيبه
قلتي حرام اتصلي عليه
انا غلطانه سمعت كلامك
أدعي عليكي يا شيخه بـ أيه ؟
وحياة مامته لـ اسيب له البيت
حتى ان قال ميت مرة ياريت
لازم يندم على أفعاله
ويخبَط راسه فـ اتخن حيط
هو مفكر ممكن اغييِر
حد يقول له انا عقلي كبير
لو راح يخرج بره حياتي
هاكسر قلة والفين زير
انا مش ناقصه وجع القلب
يحرق دمي ومن غير ذنب
كل يومين يعمل له حكايه
وارجع اصالحه بأسم الحب
نزّل دمعي القاسي الدون
ولا فكرش لعشره يصون
هو كمان راح ينزل دمعُه
لما نروح عند المأذون
عُمر ما قلبي هيعرف شفقه
لما هيخرج بره الشقه
والمحكمه تحكم لي ويدفع
الأتعاب وكمان النفقه
يلاَّ يا حلو اعمل لك صُره
لم هدومك واطلع بره
اوعى تفكر تتحداني
دانا ماهيتاب والأجر على الله .
___________
محمود السيد