ورق الكوتشينه
المترص طابور
والقص يزاحم بكتافه
والشايب مستني الدور
بيطاطي وعامل مش شافه
والولد الخايف م الطرطور
أهو واقف بيمص شفافه
..........
الظابط مش عايز شايب
والشايب مش عايز كومي
والكومي الحاضر والغايب
زعلان بيقطع ف هدومي
بيهاجم بالخمسه الورده
بيتشوط وبيخبط ف العارضه
ويغمس بالديك الرومي
وبحط المجوز ع الفرده
..........
والتسعه بتقفش ف الخمسه
تغلبها من اول لمسه
بتنام بتناشر ف الضلمه
والواحد مستني مكالمه
م العشره البلدي البستوني
من بق الرقاصه العالمه
بنفنط ورقه وبنقي
لو فاضيه يابت حتدقي
ف الدور الجي حتترقي
انتي وهيه ...
من مومـــ .....
تاخدي الباشويه
..........
والجوكر لابس ظباطي
لو تحفر تنزل ف الواطي
يا ( محمد يا عبد العاطي )
وقعت الدبابه الميه
وعشان مكسوره الحنفيه
الموت الواقف شمشيري
وداك المستشفي الميري
نايم بتعيط ف سريري
من لعب ولاد الحراميه
..........
والرابعه تلمس ف التانيه
انفضت ع العضم ف ثانيه
وبتنده .... ياولاد الزانيه
راجعه لكم بالقفل الصيني
ايامكم الجايه طحيني
بتحاول تلعب بشروطها
وتشيل الدنيا ... وتنكتها
بتغالط تحت الترابيزه
وتجوز يونس لعزيزه
وتخلف عيل م الجيزه
تعمل به فرسة طرواده
وتصلي وعليها العاده
وتقول لك ... استاذ العالم
حنسود الدنيا بشداده
..........
ورق الكوتشينه المتبعتر
ع الارض صفوف
وبيملا الشارع والحاره
من مد الشوف
كان فاهم ف الثوره الراحه
جزرايه وعنبه وتفاحه
إتسلم مفتاحها لحاحا
والملك ظروف
قام ساب العالم ف الساحه
وبيبني الروف
والتاج الناقص ف الصوره
ورانا الرجل المكسوره
يتحنجل زي العصفوره
من غير المنطق والمألوف
..........
ورق الكوتشينه المتعافي
بيشخر ف سريره الدافي
قام ساب الحمل وف كتافي
ضره ف ضربه
متعود من ضرب الحربه
لكن قدام ..........
وشي ف وشك
راجل راجل
وقف ترماي
عطل سكه
حط الديناميت
جوه الدكه
عاقب كرهينك بالفكه
مش زغده ف جنب الكوتشينه
تفتح عكا
مش حجك للباب العالي
حج ف مكه
يلا اتكا .........
مش أخره الدمل حيصفا ؟
لو فكرك حتميل الدفه
تبقي انت غشيم
أصل احنا بنشم الورده
مش بناكلها
زي اي بهيم ...
بكفايه تعدد ع الفايت
بذياده لطيم
الأخضر طالع ف الزفه
من غير برسيم
..........
ورق الكوتشينه المتفرق
ع الارض حروف
شياب وجواكر وعساكر
من كل عطوف
أرقام مش عارف ملتها
أو خلقتها ...
نسوان ... مش راسيه ف جتتها
يخرب بيتها
بتقول للعالم ثورتنا حاجه جديده
مع إني وحياة الختمه
مش قادر أفهم م الشتمه
حاجه مفيده
وعيال تتشعبط ف الزفه
تاخد لفه ؟
ولحوم ع القرمه
بتتشفا ...
ومعاويه القاعد ع الدفه
حالق زيرو
بيحارب ف اتناشر جبهه
( سينا ) و (سبها )
كتر خيره ...
والكلبه تسن ف أنيابها
تدور ... ع اللي بيخطبها
تحدف طوبها ...
بتقول لك دوله
وسلميه
بالدقن ولون الجلابيه
من روكسي لحد الشرابيه
وبتدعي العالم ينجدها
مش ساكته بتحدف بحديدها
إمسك ...إيدها
إمسك ...سيدها
دي بترجع ريما لعوايدها
إمسك ... إيدها
..........
خاااااااااااااااااتمه
اربع ورقات
طلعم ع السور
بينادوا السبعات يتشاركوا
قام لاقوا التسعات بتثور
قاعدين ع الطاوله بيتعاركوا
ورق الكوتشينه المعفور
في اللعب ... تمللي يخسركوا