** يا أميره ** بقلم الشاعر / رضا أبو الغيط

وياكى كلنا واقفين
شايلينك وف نن العين
يا اميره والتاج للراس
بنحبك وبقالنا سنين

من نيلك رويانا حنان
وقمرنا عشانك سهران
انا منك وف حضنك حاسس
يا أميره دايما بأمان
ف الغربه بشتاق انا ليكى
يوحشنى حضنك وعينيكى
بتمنى أكونلك يا أميره
الحنه اللى ف كف ايديكى
بستنى النسمه اللى تعدى
وتهدى وتبوسنى ف خدى
وابعتلك يا أميره معاها
كام بوسه ع الخد الوردى
ببعتلك وياها سلام
وأكتبلك من قلبى كلام
دعيونى ف بُعدك يا أميره
مش عارفه والله تنام
يا أميره وحشانى بجد
ولا شوفتش أنا زيك حد
راح أفوت الغربه وأجيلك
وأكونلك النيل والسد
راح اكون الجندى على حدودك
واطرحلك ف الرمل ورودك
وافديكى بدمى يا أميره
لون دمى وردى على خدودك
علشانك راح ابنى وعالى
وادعيلك من قلبى وصلى
يا أميره وبحُبك عايش
أنا بيكى وانا ليكى تملى
.....................
رضا أبو الغيط