الشمس بتصلى العشا....للشاعر محمد طه شراقة

لساك بتحسِب فْـ ( المسائل ) يا فتى ؟!
و تشوف حياتك زى حبل المشنقة
( تِجمَع ) حروفَك من على مرمى البصر
( تِطرح ) بـ خوفَك كُل اصناف البشر ; و تعيش وحيد
( تِضرَب ) فْـ أفلاك الزمان
( تقسِم ) يقينَك ع الإيمان
و تخطّى عتْبات البيبان المفتوحين
على بحر موجُ شوك السنين ; المزروعين هَمْ وآسى
و إشمعنا فرْحَك يتنسى ؟!
والحزن بس يكون مواظب ع الحضور فْـ ( المدرسة )

لِساك بتحسِب ف ( المسائل ) يا فتى ؟!
و تشوف حياتك زى حبل المشنقة

تِبلع ضميرك بعد شُربَك مِن كسات مُر الشقا
و تسيب ظنونَك فوق مسامْير الحيطان متعلَّقة
نَفْسَك بتِنزِف ; والنزيف جوَّه القنايا
بيروي أشجار الخريف
حِلمكْ كفيف
معصوب بفِكر المُستحيل
مستنى يوم يجى الدليل ؟!
دا الفرْح مِش محتاج خريطه عشان يشل
نبض الخطوط المرسومين فوق الورق
- الشمِس بتصلِّى العِشا على طرْف سِجادْة الشفَق ّ -
و الغيم بينده فْـ الملأ
على كل أسراب النجوم المفرودين جنب الهِلال لمَّا أتخلق

يُعلِن بأن الشهرَ تواً قد بدأ - و ارسم على كفَّك حلق و اهديه لكل الأُمنيات
هـ تلاقى نورَك فْـ الْفَلَق
بيصحى حِلمَك..... بالنيات