قصيدة ....فيها إن..للشاعر/ نبيل عبد الحميد

كل حاجة م إللي عِشنا
بنقابلها و بتقابلنا ..
ليه تملّي بتيجي دايماً
فيها سِنّه ..
ناقصة سِنّه ..
زايدة سِنّه عن مقاسنا
جايز الترزي إللي قاسنا
بدّل المقاسات ما بيننا ..
كُل حتة نقش حنه
جَيّه ناقص منها كف ..
كُل مرّه أهم ورقه
تبقى ناقصه من الملف ..
كُل سِلِّم ناقصُه طالِع
كل شارع
ناقصُه لف ..
كُل صف بيبقى ناقص
حد منهم / حد مِنّا ..
لِسَّه برضه فينا سِنّه ..
كل حاجه ناقصة حاجة
كل حاجه
فيها إنَّ ..