وأنا المسجون
بارسم فى عيونك
على صـِـدر حطان الزنازين
وخريطة وزحمة على حدودها
والنخل خـشــَب
والــضــِّــــل خــشـــــب
أوطان تايهة
دامعة وضايعة
وانا بانزع كل غلاف جلدى
واتصالح مع سجـَّـانى هناك
واخرج برة حدود الـهــِـدمة
أحضـُن فى فراغ ضيق
وبلاط الزنزانة الـعـَتـمـــة
وندوب فى كفوف الحرية
أمل الضلمة
حلم الشمعة
وبحاول أرسم لك يا وطن
على يومك نخل وتين وزيتون
وانا خالى الإيد الممدودة
ويا دوب عينى من طاقة حديد
شايفة الصورة
ما فيهاش ولا لون
دكاكين مفتوحة على الشارع
بتبيع أحلامنا ف قراطيس
وتسالى ومـَزَّة مع السهرة
لشلة مهاويــــــــس
سجانى العاشق لقيودى
فـَـضـَّــى الـقـُـرطاس م الأحلام
ورماه فى النار
وينادى بصوته المجنون
فـــِــزّ يا مسجون
على إيه بتحارب يا عبيط
حلمك كان جوة القرطاس
والباقى على رف النخـَّــاس
لسـَّـاك فاكر إنك قادر
بـَـطـَّـــل تـَنطــيــط
عـَدَّى على مكانك ملايين
دفتر أحوال الزنازين
كله ف إيدى
إصحى يا مجنون
بيع حلمك
فوق من وهمك
إكسر قلمك
وتبطل ترسم فى خرايط
خليك واحد فى زمن زايط
وامشى مع الريح فين ما تودى
واركب ضهر الموجة وعدّى
سجانى اللى سجن أيامى
وحرق فى وريدى ..أحلامى
أتاريه مسجون
من جوة القيد اللى ف إيدى
فى خريطة مزحزمة ....ملغومة
وحدودها المقفولة بقيودها
ورا سور عالى
جوة الزنازين
وعــــيــــــو نــِـــــك
وخرايط تايهة بأحلامى
والباقى ف شمسة أيامى
إتكتبوا زمان
على دفتر أحوال الزنازين
وبقوا سطور منقوشة بدمى على صدر الجدران فى الزنازين