انا أبويا الله يرحم أبويا
علمني كتير
علمني و قال لي إن الدنيا
لها رب كبير
قال لي ما تحزنش لشئ فاتك
حافظ علي بلدك و إخواتك
و إن يوم راح تنزل دمعاتك
كحل بالبسمة عيون الغير
انا أبويا الله يرحم أبويا
علمني كتير
قال لي ما تتغرش بالمنظر
أو أشكال ماشية بتتمنظر
و يا واد قد أعذر من أنذر
الناس مش أكتر من تصاوير
انا أبويا الله يرحم أبويا
علمني كتير
قال لي إن الدنيا ما تسواشي
سيبك من بكره اللي ما جاشي
و إن قطرك فات و ماعداشي
إياك تتبعتر في المشاوير
انا أبويا الله يرحم أبويا
علمني كتير
الدنيا بتشبه للفوازير
فـ إياك تتحير في ألغازها
خليك شفاف زي إزازها
و تولع مشاكلها بـ جاز ها
لا وزير بيدوم و لا حتي غفير
انا أبويا الله يرحم أبويا
علمني كتير
قال لي إياك يوم يا إبني تطاطي
و تمجد فـ تعلي الواطي
لو ضربوا في قلبك مطاطي
إياك تتذل فـ تبقي أسير
انا أبويا الله يرحم أبويا
علمني كتير
علمني أكتب بعد التفكير
علمني أكون إنسان بضمير
طول عمري صغير قدامه
و الليله بفكر في كلامه
بتمنى أحقق أحلامه
و الله يرحم عمنا تيسير
.....
مصطفى تيسير