لمَّا حلمك يبقى ميِّت
جوَّا بطن الاحتمال
لمَّا بدرك يبقى رافض
إنه يوصل
فوق شطوط الاكتمال
لمَّا ضلك يبقى جنبك
رغم عنك
فجأه تشعر إنه مال
لمَّا فجرك طال غيابه
والشعاع أصبح محال
رغم صبرك
ع السنين وع الأنين
رغم شوقك والحنين
لسه دمعك
زى عمرك
فوق دروب النزف سال
صوت حروفك
أيَّوا عذب
والفضا عشقك بجذب
والكون فسيح
تبنى قصرك
ياخده ريح
والأمل ويَّاك جريح
تاه
من مداه
وانكشف سر المجال
رغم إنك
آه بتهرب
تلقى همك حمل زايد
ع الكتاف
ضحكتك أيام عجاف
والوجع هد الجبال
رغم صوتك لسه عالى
والسهر طول الليالى
لسه حلمك
برضه قاعد
زى السراب صعب المنال
لمَّا حلمك يبقى ميِّت
جوَّا بطن الاحتمال
قول يارب
تلقى زرع الحلم شب
قول يارب
تلقى ضى الفجر دب
قول يارب
تلقى صوت العزم هب
والشمس تطلع
ع الأمال
لمَّا حلمك يبقى ميِّت
جوَّا بطن الاحتمال
قول يارب
............
راضي الطهطاوي