لَمَّا تحِس انَّك فِ صِراع
عُمرَك كلُّه الفَايِت ضَاع
كل الأيام جَايَّه عَليك
حَتىٰ إيديك
دايما بِتمِدَّها بالخير
تِلقىٰ الشَّر بسُرعة يطير
ويكَتِّفها منِ الرُسغين
آاااه ياسنين
عِشتِك ولانيش عارفة منين
أعرف اجِيلِك
أو حَتىٰ امشي بين مَنَاديلِك
وانا بَنادِيلِك...
لَقيتِك عُوجَة منِ الجَانبين
كل الأيام رايحة وجاية
تِدهَس فِيَّا
وتغَمِّي فِ حَبابي عنَيَّا
كل مااقول بالرَّاحة شوَيَّة
بيكون رَِّدك قاسي لَعين
آاااه يابَشر.. مالكُم ملاعين
آااه يابَشر مالهُومش أمان
مَهما أَقدِّم فَجر لبُكرَة
وانتوا تعُضُّوا فقَلب الفِكرَة
تِنسُوا الحَق وتِنسوا الذِّكرىٰ
كُلُّه ف جُعبِة راح واتهان
كل حَياتي بيعتها لِيكُم
كل العُمر فَردتُه حياة
لاجْل ارضِيكُم
كُنت الشَّاطرة دايما باغزِل
والإبرة كانِت رِجل حمار
كانت رُوحي بتِولَع دايما
لاجْل تكون قَنديل الدَّار
بس الآخِر
آاااه مِ الآخِر
كان الجِزا أوْجاع ومَرار
.................
منى عبد الرحمن