خايف.
و الكلاب وسط الشوارع كل ما تشوفني تلاحقني
و اللي مش حلو و قالقني
اني دايما خوفي زايد
مش عوايد قلبي انه
يظهر الخوف ف القصايد
بس بالتدريج باحاول
احكي خوفي لحد غيري
يمكن آلقى ف ليل مكالمة
تطرد الخوف من سريري
يمكن اتطمن بكلمة او بضحكة
جايز ألقى ف عين حبايب
خط سير آخر مصيري
حتى لو كان حب زايف
بس نفس الوقت خايف
ألقى نفسي ف صحرا وحدي
لمة و تصفصف عليا
و اما اشوف من بُعد صاحب
جاي فاتح حضنه ليا
اجري اقابله بحضني يطلع
صورة للخوف اللي فيا
.....
رمضان_عبدالتواب