اوعى يوم
اصعب عليكى
لما يعنى
تشوفى دمعه
نازله تجرى من عينيا
او تشوفى
جرحى شاقق
روحى زى الجلابيه
كملى خالص عليا
مش مهم انى اعيش
المهم انك تعيشى
اصل أنا عندك مافيشى
شيلينى الحمل كله
دغدغى الروح اللى فيا
موتينى يابهيه
كسرى الحلم
اللى فاضل
بالقساوه يامفتريه
كملى خالص عليا
مش هاقولك
راجعى نفسك
شوفى مين موجود
فى حبسك
والا مين عمال
يحبسك
فى الكلاب تنهش
فى لحمى
مين فى شده
قام ودافع
عالتباب والا المدافع
شوفى مين
بيحنى كفك
جوا لحمه قام ولفك
فين حمامك يابهيه
لما كان يحرس
غيطانك
سده ليه دايما ودانك
كملى خالص عليا
مش هاقولك
حبه حبه
او شويه م المحبه
شوفى مين
فى الجد يامه بيستخبى
والا مين شالك وعدا
ليه بنام عالبرش فيكى
والديابه عالمخده
واما الاقى الحلم فيكى
ألقى حلم قديم وصدا
شوفى ضهرى من قساوتك
كل حته فيه بعضه
كملى خالص عليا
مش هاتوب عنك وادارى
بس لما ازهق واسيبك
يبقى دا ناتج مرارى
يبقى دا آخر قرارى
افتحى قبرك وغنى
نزلينى وغصب عنى
واكتبى عالقبر ميت
قبل مافرح بيه واحنى
واكتبى فى البحث جارى
خبى فى التقرير ودارى
ان سر وفاتى فيكى
عشق خلانى
الانانى
....................
أشرف الشناوى