مديت إليكي الإيد
قومتي انتي مدِّيتي
كانت حياتي مرار
وانتي اللي حلِّيتي
حضنك بحجم الكون
حُبك حيطان بيتي
واما صلاتي نويت
كنتي انتي مواقيتي
...
وعدتي قلبي الوفا
وليه ما وفِّيتي
داويت جراح قلبك
وجراحي ماداويتي
شقيت في أرضك نيل
وف قلبي شقِّيتي
جرحك بطول الروح
من دمي حنِّيتي
سامحيني لو نظرتك
مش جوَّة في عنيا
وصوت صليل ضحكتك
مش ضحكة حواليا
سامحيني لو بالخوف
راح ينحبس صوتي
ولو لساني يبوح
تتمني يوم موتي
.....
منى الغريب