بيفرفر
حلمي المتعلق
ف مشانق أمسي الملعون
وبتنزف علشانه عيون
بالدم المخلوط بالآهه
من ذاك الكون
وجنون العالم بيشاهد
لحظات الموت اللي اتسرسب
م الكاف والنون
وظنون العقل اللي ماهمه
غير بس يكون
علي باب امبارح متمسمر
والوضع سكون
من غير ما يهون ع اللي اتحرك
خطوه لقدام
ف طابور الدنيا اللي بتندغ
وهم ..وأفيون
علي عتبه بكره المستني
م الوهم نفوق
ونبص لفوق
من خرم شعاع الحريه
اللي ما طاله سجون
ونمد ايدينا ونشعبط
ف شعاع الشمس اللي ما همه
من ضلمه بتشرب من دمه
واتمني يكون
النور الطارح ف مطارح
لأجملها عيون
أحلامها تعيش زى العصافير
فوق شجر التوت
وان حبت يوم للفرح تطير
ما تخاف نبوت
ف ايدين مجنون
عاشق للدم المتنطور
فوق الطرقات
واقف من جبنه بيتصور
فوق الأموات
وكأنه الحاكم وبإيده
أرواح الكون
******************
رضا ابو الغيط