وشايفك
وسط طين المطر
زى القمر
زى العروسه بتنشبك
بكام غويشه
وسلسله
شايفك كأنك حلم
لسه بيتولد بالبسمله
شايفك صبيه عفيه
ماشيه تتعايق بتوبها
لحظة غروبها
الشمس ترسمها
فى مكانها
مهره بتقطع م الوتد
دايما لجامها
شايفك دفا
وسط الحيطان النى
شايفك قمر
يملا السطوح بالضى
سامع حمامك
مالى احضانك
غنا
يااااااااااااا انا
انا العاشق
ودايب دوب
وافصلك بدمعى توب
بحبك وانتى محنيه
بحنيه على ولدك
وحاسس طبطبة ايدك
وتنهيدك على الموجوع
وقايده صوابعك العشره
صوانى شموع
بحبك لما تتلم
العيال فيكى
وتحكيلهم حكاويكى
يناموا من شبع جوعهم
ويصحوا الصبح عالرسمه
يشوفوا الضحكه فوق وشك
مادام عشك وطن ليهم
فخليهم كدا فى حجرك
ودفيهم
مابين كفك وبين
قلبك تربيهم
دى زرعة أرضك
الخضره دراويشك
وريشك لما هاطيرى
وصبحك لو فى يوم عدى
هاتيلهم منه كام حته
وشاوريلهم
على السكه
وعديهم
...............
اشرف الشناوى