متزعليش ....
لما اقولك مره لأ
اصل انا حطيط صوابعى
كلها منك فى شق
اصل انا راسى استوت
وماعدش فيها مكان لدق
هو يعنى لما باحلم فيكى مره
انكسر ولا اقولش لأ
طب قوليلى ازاى هاغنى
والا اضحك م الوجع
لما اشوف الصبح فيكى
للى باعك قام ركع
والا اشوف فجرك بتوبه
جى مليان بالرقع
طب قوليلى ازاى هاغنى
لما قلبى بيتخدع
متزعليش لو يوم رميتك
او نسيتك او قالولك
ان صاحبك يوم خلع
ايوا ممكن قسوتك
تغلب حنانى
ايوا ممكن ابقى
وف عشقك انانى
ايوا باغضب زى قلبى
بس بيروق وف ثوانى
متزعليش متزعليش
لو قلبى طار زى الحمام
او راح لغيرك لما حس
هناك سلام
او ساب كفوفك
لما داق ذل الغرام
متزعليش
مانا برضه نفسى
زى غيرى فى يوم اعيش
متزعليش
لو مره ديبك جاع
فكال منك مناب
متزعليش
لو مره يعنى
قسيت عليكى فى العتاب
او يوم طلبتك تيجى
نقعد للحساب
متزعليش
لو قلبى دق وحب غيرك
او صحيتى لقيتى
كلبك هش طيرك
متزعليش لو قولتلك
عاوز اعيش
متزعليش لو قولتلك
يوم ماتساويش
متزعليش
.........
اشرف الشناوى