ومين يامه
يغسلنى ويكفنى
ومين يامه
يلتمنى ويدفنى
ومين يامه
يشوف روحى
وهى طالعه
ويحضنى بدفا قلبه
ويدعيلى على قبرى
وليه يامه سبقتينى
وسيبتينى هنا لوحدى
واجيلك يامه واندهلك
وحاسس يامه أنفاسك
وشايفك وانتى بتشاورى
تعالى اقعد هنا جنبى
واحشنى ياواد
وعامل ايه
وطمنى على الأولاد
وحاوط يابنى عالزرعه
دا دود المش م الزلعه
انا حاساك
تعالى اشكيلى اوجاعك
هنا وفضفض
وماتخفش الكفن الأبيض
انا سمعاك
تعالى اقعد ونتكلم
انا عارفاك
وعارفه العند فوق راسك
انا عجناك وبايديا
ياواد خبزاك
يمين الله انا قلبى
ماشال منك
انا مسمحاك
عشان عارفاك
بتعشق بس بتدارى
عينيك فضحاك
بلاش تبكى على فراقى
دا انا جواك
وهافضل حته
من قلبك
تملى معاك
وهافضل حته
من قلبك
تملى معاك
............
اشرف الشناوى