ياحظ مالك كدا
قاعد بعيد عنى
وسايبنى وسط الوجع
تايه وباااااغنى
ترميلى ضحكه وأمل
وفى ثانيه بتخونى
اداوى جرح بجرح
وجراحى بالتوره
حتى الحبايب قوى
صبحوا يادوب صوره
نفسى اعيش فى الفضا
والف فى الملكوت
وازرع غيطان الوجع
كم الف شجرة توت
مش كل يوم انكسر
او روحى فيه بتموت
ياشمس يام الدفا
زقى عليا الباب
صحينى من غفلتى
ودينى للاحباب
الليل مافيش غير وجع
وديابه وسط كلاب
نفسى اطول السما
والمسها بايديا
وافتح بيبان الامل
واخطف انا شويه
وابدر غيطان الوجع
واسقيها بعينيا
يافجر فين ضحكتك
ماتقولى فين هيا
ياحظ مالك كدا
كارهنى من يومك
لاجيتنى مره بفرح
ولا شوفت يوم لونك
وسايبنى وسط الوجع
تايه بلا مرسا
لايوم عاوزنى افتكر
ولا يوم عاوزنى انسى
وسايبنى من غير غطا
فى بؤونه وف مسرى
عمال بتسقى البشر
تملا غيطانهم نور
وتهز لينا الشجر
يرمى الشجر بنور
واشمعن قبرى انا
ممنوع اشوف الحور
ياحظ مالك كدا
دايس على المكسور
سايق عليك النبى
بكفايه سجن وسور
وكفايه هجر وجفا
يااما عنى تغور
دا انا قلبى داب م الوجع
مع انه كان عصفور
......
اشرف الشناوى