الشعر مش قرآن كريم
ولا باعته ربى من السما
وماهوش كلام الأنبياء
ولا شئ مقدس إنما
الشعر ممكن يبقى نور
ممكن يصيبك بالعمى
الشعر يوم تلقاه جبان
ويوم يسطر ملحمه
لو يتكتب بإيدين لئيم
تلقاه عن الحق انحرف
الشعر فيه المستقيم
واللى حياته ف منعطف
فيه المطالب بالحقوق
واللى ملوش أصلا هدف
حرفين يشدو الإنتباه
وكلام يصيبك بالقرف
فيه شعر يصلح بين صحاب
وكلمه بتزيد اللهب
ممكن يضيع حق ناس
ممكن يرد اللى اتنهب
فيه حرف يؤمر بالصلاة
وللأفاضل يتوهب
فيه جمله أرخص م التراب
وحرف أغلى من الدهب
كلام كتير سهل وبسيط
وفيه كلام مليان عقد
فيه منه م يفارق السرير
بكلام كتير مالهوش عدد
وكلام يغازل فى البنات
وكلام يمجد فى البلد
تلقاه بيمدح ف الملوك
وكمان يعادى اللى انجلد
الشعر يوم تلقاه حزين
وتانى يوم بيكون طرب
فيه شعر بلسم للجروح
وكلام يصيبك بالجرب
والشعر وفق بين قلوب
بالشعر كم بيت اتخرب
ف إما نكتب بالأصول
يا إما نسكت يا عرب
...........
ابو حمزه المصري