ولا يمكن تصبح يوم عايش
وتحس الدنيا وحلاوتها
ولا تفرح مرة بغلاوتها
من غير ما تحب
ولا أى كلام يقدر يشفع
ولا نار الشوق ممكن تنفع
من غير ما تهب
دا القلب العايش وحدانى
هيقول القسوة دى واخدانى
ويدوق الغربة ومرارتها
واللوعة يجرب حرارتها
يحتار فيه طب
دا العايش وحده يا ناس ميت
فى الحزن بيصحى وبيبيت
والفكر بينحت فيه هده
ودموع العين كدا على خده
هتسيل وتكب
لو قلبك يظهر إخلاصه
راح يلقى طريقة و خلاصه
وهيمسح جرحه ويسامح
والعفو هيركب خيل جامح
للماضى يجب
طاب امتى حبيبى
راح تيجى
ونقول يا مشاعر كدا هيجى
ويتوه توقيتك فى ساعاتك
تفتحلى بلهفة دراعاتك
وتاخدنى ف عب
دا الفرع الناشف لو شافك
داق خفة دمك وخشافك
راح يطرح تانى ويخضر
وأكيد هيشب
لو قلبك يصفى ويروق
الضلمه هتصبحله شروق
ويشوف الجنه وبساتينها
زيتونها المايل على تينها
والروح ترجعله فيه تسرى
جواه هتدب
لو عمرك منك كدا فات
من غير ما تغنى الهتافات
راح تلقى الحرمان وأنينه
يكويك التنهيد وسنينه
والحسرة تشوفها وندمها
تصرخ تندب
.............
راضي علي الطهطاوي