احلامنا صابها الهلوسات
وكلامنا اشبه بالسكات
احياء ولكن قلبنا من غلبنا
طرشق ومات
وشوادر الذكر الكبيرة
مليانة ناس بتهز روس
وملاهي خمر وعربدة
مليانة بضعاف النفوس
ومابين كده ومابين كده
انا نفسي محتاج ميت قاموس
بنبات بنبكي ف السجود
ونقوم نعربد ف الوجود
وازاي نكون ف الطهر ده
وذنوبنا ليه لازم تعود
البحر بطل يختشي
ويلم كل الذكريات من عالشطوط
والفجر بطل ينتشي
والصبح ليه طالع يموت
والصورة ليه صبحت كده
من غير معالم او رتوش
لا مبينة زيف المشاعر
لا مبينة كدب الوشوش
والف ليه مستذئبة
تغرس نيابها في البدن
ونفوس مريضة ومغرضة
صابت نفوسنا بالعفن
ونروح ونمشي كلنا
ومانلاقيش حق الكفن
.................
تامر زيدان