الخلفية البيضا اياها
والوش اللي بيضحك قفش
والدنيا اللي تملي معاها
لازم ترسم كدب وغش
والصورة الموجودة ف اوضتك
وبتضحك جوه البرواز
وبتحكي الفاضل ف مسيرتك
وتقولنا ياه كان استاذ
كان قادر يضحك مع انه
هيولع من جوه بجاز
ما تحلش اصل الفزورة
اشبه ما يكون بالاعجاز
وتخطي العتبة المكسورة
وتمشي تزك بعكاز
ومسلسل اسمه الاسطورة
وبيحكي القصة ف انجاز
وشوارع صبحت مهجورة
واللحن اللي تملي نشاذ
وفلاش الكاميرا يفوقني
ويطلعني لوحدي بعيد
ف الدنيا اللي ماهش بتسعني
وتصورني كأني سعيد
والاقيني ضميري بيوجعني
لما يشيل وشي التجاعيد
واسمع ياللي نويت تسمعني
اضحك لو ضحكك هيفيد
وبنطلع فاصل برانا
واخدين بالكم ياللي معانا
شوف ايه كده احوال الناس
فرحانة الخلق دي بالذمة
وهتضحك ليه وبأي اساس
هتموت الاحلام الباقية
وهنشهر فلس الاحساس
والباقي ف اخلاقنا الحية
تحت الرجلين راح ينداس
انا اسف غمقت الصورة
غصبن عني مانا محتاس
ف الخلفية البيضا اياها
والوش اللي بيضحك قفش
والدنيا اللي تملي معاها
لازم نرسم كدب وغش
..............
تامر زيدان