وأول مره اناديكى ولا ترديش
وأول مره اقول يامّه ماتسمعينيش
وقف بينى وبينك مين؟
جدار ولاّ ...زمن ولّا ....لسانى انشّل
ولاّ انتى اصابك يامّه سهم الله
وروحتى مكان
لا ينفع فيه لا صوت عالى ولا بشويش
انا مش هندهك تانى
حرمت الرزق من اسمك
صبحت فقير
وأول مرّه احس بمعنى لفظ حقير
انا آسف
على راسك باحط تراب ؟
انا اسف
وغصبن عنى والله
اسيبك يا مّه فى الضلمة مع أغراب
انا اسف
ماكنتش احب اكون ابدا بطبع غراب
انا آسف
ماتكرهينيش
قالولى ده تراب جدى...تراب خالى وعماتى
وابويا كمان وخالاتى
انا حطيت ف أحضانك حنان تسعه من اخواتى
بطبع اللؤلؤ المنثور
بقيتوا جماعة بتصلوا وابويا إمام
وانا اللى فضلت ف الورقة
كأنى علامة استفهام
سؤال ناقص حروف ناقص سطور ناقص
لغة وكلام
انا آسف
ياريت الروح من أمرى
لكنت وصلتها عمرى
ياريتنى باعرف التحنيط
لكنت عملت لك يامّه بدن م الحور
بدن من نور
انا آسف
ماليش فى دورة الأيام
ولا ليّا ف ترتيب الصفوف للموت
وسيدنا مالوش ف الواسطة ولا بيخاف
من الكترة
ولا بيرضخ لأى شروط
ولا بيعصى ولا يماطل
ولا بيقلب معانى الحق للباطل
بيفعل كل ما يؤمر وبالمظبوط
طريقك فين ؟
وحشتينى بقالى يومين باقول يامّه
وانا عارف بإنك لسه ف اللجنة
لكن عارف بإن الأسئلة سهلة وفى الإمكان
ماهو انتى مذاكرة من قبل الآدان قايمة
وبتراجعى
مناهج سورة الرحمن
سؤال واحد
فبأى آلاء ربكما تكذبان
ولا تخافى إيديكى كلها سبحان
وكنتى ف حصن من اعوذ
ومن اعوذ وم الإخلاص
طريقك كان من الفاتحة لسورة الناس
ولا تخافى طريقك يا مّه كان خالى
من الوسواس
وياما مشيتى ورا سيدنا صلا وسلام
هترتاحى خلاص يامه
عشان ف الدنيا اجهدتى
خطى السبابة والإبهام
وعملك لسه ف الدنيا ومش مقطوع
انا صدقة وانا علمك وانا صالح
اخيرا يامه هاتعيشى يا أميّة
عرفتى السكة م الفطرة لغاية آخر النية
موديّة سنين عمرك ذهاب ورجوع
من السجادة للمدنه سجود وركوع
مخلية الصيام قصة
محلية الزكا بدموع
فلو كنتى هتنسينى وتتلخمى مابين الحسنى وزيادة
اديكى بين إيدين ربك
قولى له يامه كالعادة
ينجينى يخلينى اقضى الباقى ف عبادة
واجيلك بالميراث ملفوف
كفوف طاهرة
وساندة القلب بشهادة
سلام يامّه
ماهو أصل البقاء لله
هو الواحد هو القاهر
ولا والد ولا مولود
ولا كان له شريك وياه
واشهد أن سيدنا رسول الله
...........
حمدي موسى