واكمن
الفجر اللي اتعود
ف عينيكي ينام
أستأذن
يتأخر حبة ف الصحيان
جايز ...عشمان
ف الشمس اللي
بتشرق من وسط عينيكي
تبعت له هدية
أو يمكن ..بردان
ويخاف لو فارق جفنك
ياخد.. نزلة برد
أيا عود الورد
الفارد ضّلة ..بتساع الكون
غَيرَّتي ف عمري الباقي
شكل الكون
شَبّكتي خطوط الطول
ف خطوط العرض
علمتي الأرض البور
تطرح عشق
عَوّدتي
النجم التايه يتونس بيكي
خليتي الموجة ف بحر الغيرة
تكسر مجداف الصبر ف قلبي
وبدأت اغير واتمنى
لو أخد مرَّة
مكان الفجر وانام
ف عينيكي
انا كنت فرشت رموشك
بأماني العمر الجاي
وقسمت اليوم نصين
النص الأول
بيفكر فيكي
والتاني
بيجمع شوق العمر
ويهديه ليكي
وكنت أسمّي الصبح بأسمك
واجمع كل حكاوي العشق
واغزل رسمك
وابني لك بيت م الضي
فوق سطح القمر
وأخلي القلب
فراشة
تحوم حواليكي
وأمّر نن العين ما ينمشِِ
ولا يغمض جفن
واكتشف الحرف التاسع والعشرين
من لغة الحب اللي عينيكِ
بتتهجى حروفها
وأزوَّد ف بحور الشعر
البحر اللي ما يعرفش
خصام أو هجر
واكتب
ف نهاية السطر
عاشق
بيدوق الحب لأول مرة
ف خريف العمر
ـــــــــــــــــــــــــــ
علي نوح